Eskavatorët do të jenë në gjendje të ndërtojnë struktura në mënyrë autonome

12 February, 2024

Në Zvicër një grup kërkuesish kanë modifikuar me sukses një eskavator që do të ndërtojë mure prej guri në mënyrë autonome, pa ndihmën e njeriut, duke i hapur kështu rrugë automatizimit të këtij procesi pune që deri më tani është kryer manualisht.

Skuadra e universitetit ETH në Zyrih ka krijuar me sukses një eskavator i cili punon në mënyrë të pavarur i quajtur HEAP (Eskavator për qëllime të pavarura), një makineri e aftë për të përballuar forma dhe madhësi të ndryshme guri, betoni të ricikluar dhe materiale të tjera me qëllim ndërtimin e strukturave si p.sh mure.

Për këtë studim u përdor një eskavator tip Menzi Muck M545, një makineri 12 tonëshe e modifikuar në mënyrë të tillë që të operojë e pavarur dhe e ndarë nga puna manuale. Eskavatori ka cilindra hidraulik me forcë të kontrollueshme dhe të veçantë në shasinë e makinerisë për t’u përshtatur me çdo terren.

Eskavatori është i pajisur me një seri sensorësh, përfshirë LIDAR, IMU dhe GNSS. Këto sensorë raportojnë çdo lëvizje të makinerisë dhe të mjedisit ku operon tek një softuer dhe algoritëm specifik të krijuar për këtë proces.

HEAP së fundmi arriti me sukses ndërtimin e një muri 6 metër të lartë dhe 65 m të gjatë në kuadër të një projekti të planifikuar në Oberglatt, Zvicër.

Falë sensorëve të tij, eskavatori mundet të shenjojë të gjithë perimetrin në 3D për të identifikuar blloqet që mund të përdoren në ndërtim. Pajisje posaçërisht të dizejnuara dhe qasjet vizionare bëjnë të mundur që makineria të skanojë gurë të përshtatshëm në distancë të afërt e të detektojë peshën apo dhe qendrën e gravitetit. Këtu futet në lojë dhe një algoritëm tjetër i cili shërben për të përzgjedhur në mënyrën më optimale vendndodhjen e gurëve brenda perimetrit ku do të ndërtohet struktura.